En Oa'negea' as ist hait untertschrim kemmen, men sicht a zboate bichtege naieket, s ist kemmen gamòcht an ausònder plòtz “Azioni Enti Locali” en Trentino Digitale, gònz gamòcht ver de Gamoa'n as, no as sèll as sok der kontratt, der bart hom zboa sitzn en Trea't: oa'na bou as ist Trentino Digitale ont oa'na bou as ist der Consorzio van Gamoa'n.
Der nai plòtz bart sai' der ourt bou organiziern ont mòchen òlla de òrbetn no en de stros va de teknologische vernaierung ont digitaltransision va de Trentiner Gamoa'n.
De struktur bart se tea' sèll as araus kimmp van Regiarkomitat, de bart en helven en de Gamoa'n iber de argomentn va de digitalisierugn, vernaierung ont bècksl ver sa trong envire sèll as men hòt en sinn ont as menn miast tea' va de Agenda Digitale, ont nou ver sa trong envire sèll as sok der viarer van draijorplan ver de informatik en de Òllgamoa' òrbetomtn 2020 – 2022.
S stuck iber de Gamoa’n bart klòffen van platz en de beiln as men òrbetn bart, ont van u’gahengetn dinstn za unterstitzn der bècksl van aigenen lokal entn.
De òrbetring va de zòmmòrbet sai’ unterstrichen van Provinzalasesor en Birtschòftverpesser, as sok as Trentino Digitale ont der Consorzio van Gamoa’n barn òrbetn no en schaung, en zòmmklaum ont en zòmmleing sèll as de Gamoa’n bòrtn se ont as de noat hom, abia digitaldinstn, ont ver za hèlven en de sai’ digitalisierung ont van lònt.
De zòmmòrbet bart trong en reklam va projektn ont naia dinstn zòmm gamòcht, oa’ne pet de Autonome Provinz va Trea’t; ont nou en bèrt gem en de kompetenzn ont en de òrbet van Consorzio van Gamoa’n ont va Trentino Digitale, iberhaup en de zòmmòrbetn va verpesser va de zòmmòrbet pet de amministrazionen ont de Tolgamoa’schòftn.
Kan Consorzio van Gamoa’n bart u’stellt kemmen an “Informativtirl”, as bart sai’ an punkt ver u’song ont vrogn iber en de digitalisierung ont de naiòrbetn avn lònt.
De zboa bèrkn barn miasn vinnen ont arozoachen de u’hengendinstn as gem sai’, ont de qualitet ont de neat van gamoa’platz, ober de barn iberhaup miasn òrbetn ver za tea’ ont regiarn de digitaldinstn ont ver de u’learn van u’stelltn van Gamoa’n.
Trentino Digitale ont der Consorzio van Gamoa’n barn versichern en lònt uniformitet van strategi, pet de helf en de Gamoa’n za tschernen de regiar ont de teknologi ver za mòchen sa oa’ne sai’ en de provinzal ont nazional naiketn, petn rif van digitalbècksl va de Autonome Provinz va Trea’t.
De zboa bèrkn tea’ schoa’ hait zòmmòrbetn zòmm pet de Provinz, ver za trong envire a stòttnaiket ver de digitaltransision, ver za tea’ ont reklam mòchen, en òlla de Gamoa’n, van a zeichen naia digitaldinstn, en an glaichen vurm avn gònze provinzallònt, ver en guat van lait.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
