De sai’ viara gaben de òrbetn vourstellt, s puach va Bersani; s puach va Werner Bätzing pet titl “Die Alpn”, gadruckt va WBG; Arno Camenisch pet de “Ultima neve”, gadruckt va Keller, ont Anibale Salsa pet “I paesaggi delle Alpi” gadruckt va Donzelli. Bail der trèff ist kemmen gem en musiker Mario Brunello der prais “Guardiano dell’Arca 2020”, augaleik en 2017 en gadenk va Osvaldo Dongilli.
Silvia Giorcelli Bersani, learer va Romaneta Gschicht ont Latainesche Schrift en de Universitet va Torino, hòt studiart de virm as trong hom en de romanisiarung, bail en de zait van imperialismus,van politischn ont sozial strukturn va de gamoa’schòftn va de Alpn ont de Cisalpn.
“L’impero in quota” (Ed. Einaudi) klòfft van romanische pasitz van Alpn (zan earstn lai ver politischn ont strategeschn schultn) ont van lònksom kennen, van lait as pasitzt hom, an lònt as zan earstn tsechen gaben ist abia kempfe ont schlècht, ont derno derkennt abia plòtz en beil za meing vinnen guata ont za meing a birtschòft aupaun.
Asou de giuria hòt derklort avai: “L’Impero in quota va Silvia Giorcelli Bersani biderpaut gònz guat s jorhunderte stea’ van Romanen en de Alpn: militar, sozial ont kultural. Der vurm van kontarn bèckslt der tema en a groasa ont raicha gschicht. De antropologesch-kultural òrbet tuat se au en òndra ben as runt va hait sai’ iber en lem hait en pèrg ont iber en de moglechketn van Alpn en Europa”.
Der prais
Der prais, offet en òlla de sprochn van Alpn, kimmp haitzegento unterstizt ont pahòltn va Ars Venandi, va de familia Rigoni Stern, va de Autonome Provinz va Trea’t, va de Region Veneto, van gamoa’n va Asiago ont Riva del Garda, van Museo degli Usi e Costumi della Gente Trentina, va Federcaccia, va Itas Mutua ont va Rigoni va Asiago.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
