“Dar Euregio iz starch – dar hattz gezoaget nå a bòtta durch di zait von Covid-19 un balda iz khent gespèrrt dar konfì. Durch disa zait, saibaraz geholft pittnåndar, azpe zo khoava geplèttra zo protédjrase, zo traga di krånkhan in di intensifterapì, sin zo vüara di federal politìk zo detzidra zo lazza gian di parentn zo venna soine kronkhan”, hatta gemecht dar vorsitzar Platter in soinar rede. “Bar håm genützt disa zait zo pensàra aft bia, vürgianante, maktze gröasarn dar Euregio. Dar Euregio iz nètt lai pintnse proforma, ma – bia ’z iz khent gozoaget übarhaup in di lestn zaitn vo krise – a bichtegar strument zo arbata pittnåndar. Azzta est di drai lentar mang schaung hintar afte zen djar vo mittarbait, iz a konferma un a mission o: “In dise zen djar, dar Euregio hatt gemacht seng baz ma mage auhaltn, in gratzia dar mittarbait von drai toaln un bia ’z bekslt håm starche partner nidar nåmp. Disar iz an auftrage vor alle üs zo traga vür un zo vorsterchra in Euregio, zoa azzta di djeneratziongen boda bartn nå khemmen, mang håm guatz vo ditza starch gepunt” hatta khött dar vorsitzar Gunther Platter.
Vor in vorsitzar vodar Provintz vo Poatzan, dar Euregio iz a djüstar gelükh vor di lentar bodasan soin toal ombromm dar prodjètt durchdigrentzan gründet in a gelaichega stòrdja un, lai, lirntar in bege zo macha fronte bazaz paitet alle tang un bodaz bart no auzvalln. In a bèlt hèrta mearar gepuntet un gelaich bobrall, muchtma arbatn hèrta mearar pittnåndar pittn redjongen. In dise earstn zen djar vo Euregio, soinda sa khent gemacht vil sachandar vor di laüt von Tirol, von Alto Adige un von Trentino, hatta khött hoatar dar vorsitzar altoatesì. Vor imen bazdada iz khent gemacht, gitt koradjo un lai zoagetz ke, aftaz khlumma, di Europa mage gian übar di grentzan un auhaltn daz sèll boda vürkhint, arbante pittnåndar.
Vor in vorsitzar vodar autonome Provintz vo Tria, di 10 djar von Euregio bölln soin gemunt eppaz bichte. Da gem vèrt zo maga seng allz dazzel boda iz khent gemacht fin est un boden håm gemacht khennen un guat schètzan von laüt von drai lentar. Darzua machansa zuarschaung in zaitn boda bartn khemmen pitt muntarkhait, pensarànte aft baz ma mage no tüan. Di naüng sachandar boda bartn khemmen gemacht, bartn helvan no mearar di laüt boda lem in Euregio, hattar khött an lestn da trianar vorsitzar.
“I nimm å gearn ke, in okkasiong von aniversardjo, di rapresentent von åndarn Lentar GECT khemmenaz zo venna un haltn di djar konferentz von GECT a Innsbruck”, hattar khött darzua dar vorsitzar Platter. ” Alle biar gebinnenda vo disa ausbekhslum vo informatzion un gekhenna”.
In vraita atz 1 von bimmat, aftn djartrèff von GECT izta khent augelekk di fondatzion von GECT Euregio Connect von drai provintzal turistik organizaziongen alz da 80ste “Gruppo Europeo di Cooperazione Territoriale”. Schaugante å bia ’z izta khent organizart dar ratloaf “Tour of the Alps!”, bartnda khemmen gemacht alle di prodjètte boda seng arbatn pittnåndar di Tirol Werbung, in IDM Alto Adige un di Trentino Marketing vor bazda ågeat turismo un sport.
Apostolos Tzitzikostas, vorsitzar von Komitat Europeo von Redjongen, hatt khött:”Di mittararbat übargrentzan un interlentar, izzese nia fermart azó azpe in di lestn 10 djar. Di krise von Covid-19 hattaz gezoaget bazzez bill soin gemunt sperrn di grentzan, ma di hattaz o gezoaget bia di europei, pittnåndar, soin guat zo gianasan auz, zo venna naüge beng un zo helvanen ummaz pittn åndar. Ditza iz dazzel boda bill zoang arbatn gianante übar di grentzan: håm hilfe ummaz pittn åndar vo di gesunthait, vor di bekhslum von klima, vor di platzbèkhslum von laüt un von imprese, di plètzekonomìe un di nåsuachum.
Di tirolesvorsitzarumzait von Euregio
In bintmånat 2019, balda di vorsitzerum iz khent ågenump von Tirol, izta khent untargeschribet in Alpacht, an govèrnprogråmm pitt 51 prodjette. “Ditza hattmaz nia gesek pellar in di Stòrdja von Euregio. Est, pittn tratèt untargeschribet in vorgånnate snitt månat, habar gemacht di earstn pèss zoa azta dar Euregio mage soin boroatet zo giana vür vor di zen djar boda bartn nå khemmen”, hatta khött dar vorsitzar Platter, boda hatt augelekk in “Gruppo Europeo di Cooperazione Territoriale (GECT)” pittn koléng vo alóra Luis Durnwalder (Alto Adige) un Lorenzo Dellai (Trentino), alz hilfstruktur vor an uantzegen åmt. Platter: ”In da sèll zait, dar üsar GECT iz gest dar earst in Österraich, dar zboate in Beleschlånt un dar 21ste in da gåntz Europa”. In di zait, vil idee soin khent vürgetrakk: von Valanghe.report von Euregio, aftn Master von Euregio vor di provintzal ågestèllte un di bolkhentkartèlln gelekk aftz alle di grentzan zuar in nåmpn lentar, hundart djar dòpo azta dar Tirol iz khent augetoalt. “Da bölln zoang übarhaup bia di drai toaln von Euregio arbatn pittnåndar alz europeelentar – azpe dar earst Tage von Kamòündar von Euregio bodase iz gehaltet a Hall”, izta sichar dar vorsitzar Platter. In zen djar, dar Euregio hatt augelekk un vürgetrakk 354 prodjette in 25 trèff vo Djunta. Untar dar tirolesvorsitzarumzait, darzua, izta khent inngerichtet dar tagezettel vor di offentle vüarum “Euregio2Plus” un disa boch dar "Euregio Ticket Students", ’z izta khent nidargelekk dar progråmm "Euregio macht Schule" vor di schualn un izta khent ågeheft ’z Djar von Musei Euregio 2021, boda nemmen toal 60 musei von drai lentar. “Alle di prodjètte nemparn in Euregio in laüt – un disar iz, an lestn, dar obietiv vo disarn arbat bobar machen pittnåndar”, hatta khött an lestn Platter.
Übarsetzt von Türle afta Zimbarzung von Kamou vo Lusérn
(Traduzione a cura dello Sportello linguistico del Comune di Luserna)
