La cordanza sotscrita anché la perveit na seconda neva emportanta, che fossa la creazion de na area spezifica “Azions Enc Locai” te Trentino Digitale, deldut dedichèda ai Comuns che, a una coi obietives del contrat de rei, l’arà doi logamenc a Trent: un aló da Trentino Digitale e un aló dal Consorzie di Comuns.
La neva area sarà en dut e per dut l pont de referiment per la programazion e la metuda en doura di intervenc coleé col percors de inovazion tecnologica e de passaje digitèl di Comuns trentins.
La strutura metarà en esser l’endrez stabilì dal Comitat de gestion, la sporjarà didament strategich e operatif ai medemi Comuns en cont de la digitalisazion, inovazion e trasformazion per arjonjer i obietives e i oblighes de la Ajenda Digitèla, estra che – l’é scrit te la cordanza – per meter en doura i prinzipies prinzipèi del Pian di trei egn per l’informatica te la Aministrazion Publica 2020-2022.
L’area dedichèda ai Comuns dezidarà la arees de intervent, e i servijes coleé per didèr l prozediment de trasformazion digitèla di medemi enc locai.
L setor de atività de la cordanza l vegn confermà da l’assessorat provinzièl al Svilup Economich, aldò de chel che Trentino Digitale e Consorzie di Comuns i se cruziarà del control, de la regoeta e de l’endrez de la spetadives e di besegnes di Comuns, en cont de servijes digitèi e de didament per la digitalisazion di medemi enc e del teritorie.
L’aleanza strategica engaissarà la promozion de projec e neves servijes coleé, a una co la Provinzia autonoma de Trent, estra che valorisèr la competenzes e la manscions del Consorzie di Comuns e de Trentino Digitale, avisa te la azions coleèdes de svilup de la relazions co la aministrazions e la Comunitèdes de Val.
Alò dal Consorzie di Comuns vegnarà metù sù l “Portel de l’informazion” desche pont de referiment per segnalazions e domanes che revèrda la digitalisazion e la scomenzadives sul teritorie.
La doi sozietèdes les cognarà troèr fora e meter jù na mapa di servijes de conetività che l’é a la leta, troan fora calità e corespondenza ai besegnes di teritories di comuns, ma soraldut vegnarà endrezà n lurier per realisèr e gestir i sevijes digitèi e aplicatives e per formèr l personal di Comuns.
Trentino Digitale e Consorzie di Comuns i arsegurarà al teritorie pervalivanza de strategìes, didan i Comuns te la cernies de gestion e teconologiches per tor pèrt a scomenzadives provinzièles e nazionèles dintornvìa la strategìes de trasformazion digitèla de la Provinzia autonoma de Trent.
La doi sozietèdes jà anchecondì les laora a a una co la Provinzia, per meter a jir na scomenzadiva nazionèla per l passaje digitèl, per la realisazion e l sparpagnament, te duc i Comuns, de diesc servijes neves digitèi, a na vida pervaliva sun dut l tegnir de la Provinzia e a favor di sentadins.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
