Mercoledì, 06 Ottobre 2021 - 15:36 Comunicato 2761

Traduzione in mòcheno
Vinfjorhundert van zboate Statut va Autonomi, an bando ver de trentiner jungen artistn

Vrong vour de 31 van schanmikeal 2021

An òllgamoa’ bando ver za gem bèrt as de jungen artistn toalnemmen en de zuazoln gamòcht ver de jungen as lem en Trentin, oder as hom sitz asn provinzallònt, ver za vourstelln projektn asn vinfjorhundert van zboate Statut va Autonomi: de provinzal Junta hòt u’ganommen der bando en vraita en earste to van schanmikeal, no en a vourtschbinn van schual, universitet ont kultur asesor, sai’ kemmen semm galeick 140 tausnt euro ver naiòrbetn ver en theater, ver de musik, ver en tònzn, ver de audiovisiv ont ver de visivkunstn.
S ist der earste bando as geat no en artikl 28 bis van provinzal gasetz as de kultural òrbetn ont iberhaup as kearn en de iniziativ ver en vinfjorhundert van zboate Statut va Autonomi ont as men schoa’ tschbinnt za stelln vour en an zboategen bando en 2022. Men tschbinnt za gem bèrt en de jungen nèt lai abia de sèlln as prauchen de kultur ober abia de sèlln as mòchen de kultur ont asou meing vertiaven de gschicht va de trentinisce gamoa’schòft iberhaup as de Autonomi. De vrong va paitrog barn meing kemmen vourstellt vour de 31 van schanmikeal 2021 en Dinst òrbetn ont kultural produzion.
Palazzo Provincia autonoma di Trento [ Foto Romano Magrone Archivio Ufficio Stampa]

Tsechen as der bando der kònnt kemmen gamòcht ver an schouber kultural dinger, ver za schatzn de projektn ist kemmen gamòcht an òrbetgrupp, as der kimmp nèt zolt, ont de toalnemmer sai’ der viarer van kulturalòrbetdinst va de autonome Provinz va Trea't Claudio Martinelli, der viarer van Zentrum Dinstn Kultural S. Chiara Francesco Nardelli, der viarer van Modernkunst Museum Gabriele Lorenzoni, der voursteaner van Trentin Film Kommission Luca Ferrario, de viareren va de Fondazion van Storische Museum van Trentin Sara Zanatta ont ver en Komitat ver en Vinfjorhundert van zboate Statut va autonomi Elisa Bertò.

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)

(cdt)


Immagini