Di toalnemmar von board Eusalp håm guat geschètzt un ågenump di haup pünkt vodar kandidatùr vo Trentino un Südtirol khurtz khött in drai arbat ziln: ånemmen allz daz peste boda iz khent getånt pellar vo berda hatt vürgevüart Eusalp; gem vèrt in sèll soin guat zo halta hèrt un zo giana vürsnen boda håm di pèrng un di relatziong bosa håm pinn groazan ebenen un pitt soin metropoli; soin di schoaz zo heva bidar å dopo dar sbern zait vodar pandemì.
’Z soinda toal vo Eusalp 48 redjongen vo simm alpinar state: Österraich, Taütschlånt, Beleschlånt, Fråntscha, Svaitz, Slovenia un Liechtenstein, boda arbatn panåndar atz prodjèkte vürzonemma bazta haüt vorstaz da alpinar redjong. Da soin noüne di arbat khnöpf (khött atziong khnöpf) zentràl struméntn vor dise arbatn: dar Südtirol un dar Trentino spiln an spitz ruolo in drai vo disan: ’Z Åmt CasaClima vodar autonome Provìntz vo Poatzan, pittnåndar pittar frantzesegan redjong Auvergne Rhone Alpes, vüart in khnopf 9 zo pezzra bazta ågeat dar enerdjì un vor di enerdjìan bodase vornaügarn, anvétze di Provìntz vo Tria vüart in arbat khnopf 3 afte istrutziong, boda arbatet tra daz åndar zo maga inntretn afte arbat apunto durch dar schual. An lestn dar euregio Tirol-Südtirol-Trentinovuart in arbat khnopf afte traspòrte. ’Z khinta auz hoatar biavl da soin di kompite un da groaz arbat vor berda vortretet di pürgar tra Müchen un Milån in an geografike raum boda geat von Balkani afte frantzesegan Alpm.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
