La Conferenza l’é da semper n moment de scontrèda strategica che fèsc pèrt del chèder più generèl de la politiches per la Mendranzes linguistiches, ge dajan l met a la Jonta de agiornèr l stat de atuazion del program de legislatura en referiment apontin a l’argoment de la comunitèdes linguistiches storiches.
Anter i ponc a l’orden del dì porté dant endèna la scontrèda de mercol sera l’é stat rejonà del stat de atuazion de la promozion e del stravardament de la mendranzes storiches tel Trentin. Avisa l president de l’Autorità per la mendranzes linguistiches Dario Pallaoro, tel portèr dant sia relazion ai membres, l’à despiegà coche fèsc besegn de meter en esser na fona colaborazion anter Provinzia e la comunità per ge fèr cognoscer la mendranzes linguistiches a chi che stèsc tel Trentin e ai joegn e coche l didament da pèrt de la scola l’é fondamentèl per n bon stravardament. N’autra pèrt olache fèsc besegn meter vèrda l’é chela sozio-economica, l besegn che la jent posse stèr e jir de retorn a stèr te chisc raions se emprevalan de dut chel che pel ge sporjer l teritorie. Anter i consees l’é ence l besegn de pissèr a indicatores per la valutazion de la politiches linguistiches.
L professor de l’Università di studies de Trent Jens Woelk enveze l’à metù al luster coche l’é emportant per la mendranzes “se meter en rei” se emprevalan de duta la tecnologìes che l’é a la leta. L’à ence despiegà che i diesc egn che vegn i sarà fondamentèi per la soravivenza de la mendranzes linguistiches, e per chesta rejon fèsc besegn enjignèr n pian coordenà, co na vijion de loch temp a chel che cogn esser na partezipazion dal bas. Cogn vegnir arsegurà a la mendranzes n prozess de autodeterminazion per l davegnir, n laboratorie per se enstesse e per dut l Trentin.
Endèna la conferenza l’à rejonà ence la dozenta e enrescidora Giorgia Decarli con n aporfondiment dedicà a la esperienzes de la scoles mochena e cimbra. L’é vegnù fora che, enceben che sie en esser n chèder normatif provinzièl per n fort stravardament del derit a l’ensegnament del lengaz de mendranza, chest somea che no l vegne metù en esser a na vida concreta – avisa, te la pèrt aministrativa, - te la scola. En cont de chest, la segnalazion de condizion critica vegnuda fora te la enrescida, met al luster la dificoltèdes tel reclutèr e tel stabilisèr l personal de la scola, ence de didament, di sansceres e di ausilières te la scolines e te la scoles populères. L sens de partegnuda a la comunità teritorièla, zenza na fona consaputa de l’emportanza del codesc linguistich de la mendranza, no l’é assà per mantegnir vif l lengaz.
Per l’an 2020, en referiment al renovament di orghegn di Comuns e del Comun general de Fascia, ai sperlongiamenc conzedui per la prejentazion de la domanes de finanziament e a la proponetes da meter ite tel Pian de l’informazion metù jù da la Jonta provinzièla, chesta pruma sentèda doventa n moment de coleament, ence respet a vèlch una costion emportanta. L’apuntament che vegn – co la seconda pèrt de la Conferenza de la mendranzes – l’é pervedù per jené del 2021 e enlouta vegnarà tout sù i ac de programazion che revèrda apontin l Program di intervenc per l’editoria an 2021 e vegnarà spartì l Fon provinzièl per la mendranzes per l’an 2021.
Imagines e intervista al president Fugatti per endrez de l’Ofize stampa
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
