La scontrèda de en jebia ai 18 de mèrz la fèsc pèrt de la Cordanza de colaborazion strategica metuda a jir de oril del 2020 anter la Provinzia autonoma de Trent e l Consorzie di Comuns trentins en cont de la trasformazion digitèla e avisa di servijes on line e di portai web di enc del teritorie. L’obietif revèrda la semplificazion, standardisazion, pervalivanza di servijes, con gran atenzion a duta la fases de ideazion, ralisazion e metuda a la leta di medemi servijes e di strumenc digitèi, che l’é stat svilupà aldò di besegnes reèi di sentadins e de la firmes.
L’assessor provinzièl per l svilup economich, enrescida e lurier, Achille Spinelli l’à recordà che formes de inovazion e de crescimonia di enc locai, les vegn portèdes inant da egn tel Trentin: “Demò te l’ùtim temp sion stac bogn aboncont de concretisèr chisc obietives, de gra al lurier del Consorzie, de la strutures provinzièles e de Trentino Digitale”.
L’assessor Spinelli l’à metù al luster ence la colaborazion col Partiment per la trasformazion digitèla de la presidenza del Consei di ministres: “L’inovazion e, amò de più, la digitalisazion les à de besegn de colaborazions nazionèles e internazionèles, percheche l sentadin posse ite a na vida sorida e en segureza te n soul ecosistem digitèl, olache dut l’é più vejin e no l’é spartijon de la competenzes anter Goern zentrèl e i enc teritorièi”.
La sinergìa anter Provinzia, Consorzie e Trentino Digitale l’à jà dat l met de realisèr desvaliva sorts de didament a favor di sentadins e de la firmes e a sia digitalisazion. Tras i neves canai digitèi, ti meisc passé, l’é stat ciarià servijes desche l bonus alimentèr, l bonus rodes, l bonus vacanzes e i avisc de calità.
Na pèrt emportanta la é metuda en esser da Trentino Digitale, sozietà de sistem de la Provinzia autonoma de Trent. “La trasformazion digitèla di Comuns – l’à dit sie president Carlo Dalladio - l’é na pèrt emportnata per la competitività economica e l benesser di sentadins. Trentino Digitale l’é a la leta di Comuns per arsegurèr l didament a dò a dò e pien per l prozess de digitalisazion. Per chesta rejon – l’à fenì sù l president Delladio – Trentino digitale la se à endotà de n nef model de endrez e per la pruma outa l’é stat metù sù l nef, spezifich partiment per i enc locai. No l’era mai stat fat chesta sorts de cernies”.
Via per de dezember passà, la Provinzia autonoma de Trent l’à sotscrit la cordanza co la Presidenza del consei di ministres (Partiment per la trasformazion digitèla), col fin de compagnèr i Comuns trentins apontin tel prozess de digitalisazion de sie servijes. La cordanza l’à l fin ence de meter en esser l switch off di servijes digitèi, pervdù ai 28 de firé del 2021. Da chesta data inant, duta la aminsitrazions les cogn tor pèrt a la piataformes digitèles nazionèles, desche PagoPa per i paamenc eletronics, Spid per l’identità digitèla, l’ap IO per l soul pont de azess ai servijes digitèi.
“L Trentin – l’à sotrissà Erika Miglietta del Partiment per la trasformazion digitèla de la presidenza del Consei – l’é n raion che l’à semper abù n fon orientament per l’inovazion e chest à dat l met de arjonjer i resultac de anchecondì, de gra a n lurier de grop che se à svilupà ti egn”.
L projet de trasformazion digitèla de la aministrazions locales l’é dò a vegnir realisà e per chest l’é stat enjignà n finanziament de 740 mile euro. L’atività l’à dat l met de arjonjer i obietives target ai 28 de firé del 2021 per duta la aministrazions de comun.
Tel medemo temp, de gra a la cordanza chèder sotscrita da la Provinzia col gestor de identità digitèles Lepida (Emilia Romagna), i Comun trentins i é stac metui te la condizions de ge dèr fora a sie sentadins tant la identità digitèla Spid che l document de recognosciment eletronich.
Ti meisc che vegn duc i Comuns trentins i podarà, ence tras sic istituzionèi, meter dant servijes on line coleé a la ap IO e al zircuit de paament PagoPa, a chel che se podarà ite de gra a l’identità digitèla Spid.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
