Giuseppe Detomas l’à metù al luster l zenter per i vazins e l servije che ge vegn arsegurà dal volontariat a la popolazion de diescmile jent che endèna la sajon turistica la doventa de 75.000 jent. L’à domanà didament percheche l servije posse jir inant.
L president Fugatti l’à sotrissà l’emportanza de la scontrèdes sul teritorie, per cognoscer miec i argomenc più emportanc per la comunanza. L’à recordà i dans entravegnui ence te Fascia a cajon del tormen Vaia. L’à ence palesà la determinazion da pèrt de la Jonta provinzièla de se cruzièr di projec e intervenc struturèi per la mobilità col confermèr la volontà de finanzièr la varianta Cianacei-Ciampedel. Fin ades, l’à dit, no l’é indicazions nazionèles segures en cont de vazinazions per i turisć.
L’assessor al Turism Roberto Failoni l se à dit otimist en referiment a la sajon da d’istà. L’à recordà l numer di avisc resservé al setor e l’atenzion che ge vegn dat, tras la colaborazion e evenc sportives de gran emportanza, ence ai raions de aut livel e da gran turism desche Fascia.
L’assessora a la sanità Stefania Segnana l’à portà dant la situazion en cont de l’atività di vazins, sotrissan l’emportanza de fèr amò informazion e sensibilisazion ti confronc de chi che no à amò tout pèrt a la campagna, chest ence per miorèr te Fascia i dac che revèrda la vazinazions de la jent che à più che 60 egn.
L’assessora a l’agricoltura, bosć, ciacia e pesćia Giulia Zanotelli, tel recordèr ence ela i dans entravegnui a cajon del tormen Vaia, l’à volù rejonèr en cont de la besties che magna cèrn, metan al luster che l’é dò che vegn endrezà na scomenzadiva de informazion aposta per turisć e per la popolazion che stèsc te chisc raions en cont de coche ge vel se comportèr. L’é dò che vegn rejonà, l’à dit, co la autoritèdes nazionèles per meter en segureza la mont e la zootecnica, patrimonie de nosc raion.
Ence l’assessor Lorenzo Ossanna l’à fat sie salut, se palesan a na vida positiva su l’usanza da pèrt de la Jonta provinzièla de se binèr sul teritorie. La senadora Elena Testor l’à metù dant l’atività che vegn fat a Roma per meter al luster i raions da mont e l’à recordà l contegnù del fon per la mont. L conseier provinzièl Guglielmi l’à portà dant l contegnù de n provediment legislatif, metù dant da el e aproà ti dis passé da dut l Consei provinzièl a una, co l’obietif de recognoscer l Comun general de Fascia tel Consei de la Autonomìes Locales.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
