Traduzione in ladino
L’é stat aproà la neva Convenzion e l nef Statut del Gect Euregio
La Jonta provinzièla trentina l’à aproà i neves schemes de Convenzion e de Statut del GECT Euregio Tirol-Südtirol-Trentin, l strument istituzionèl che à finalitèdes de coejion economica e sozièla tras la rei de cooperazion interregionèla di trei raions. L provediment sera sù, per la pèrt trentina, l’iter de mudazion di doi documenc, che i é stac sotscric per la pruma outa da man di trei presidenc de la Provinzies autonomes de Trent e de Busan e del Land Tirol ai 14 de jugn del 2011, dì canche l’é nasciù l Grop European de Cooperazion Teritorièla te na area geografica che à leames storics e tradizions medemes.
Co la sotscrizion de la Convenzion e del statut del’Euregio i raporc de colaborazion anter i trei raions i é semper più fons, e l’é peà via sacotenc projec a benefizie de la popolazions locales.
Da pech i membres del GECT, conscidran la mudazions entravegnudes tel chèder politich, sozièl e economich e la neva endesfides del davegnir, i à valutà a una l’oportunità de adatament di ac costitutives de l’organism medemo, metan a jir n prozess de reforma.
I neves tesć de Convenzion e de Statut i porta dant, respet a l’endrez de anchecondì, na lingia de inovazions che les vegnarà metudes en doura da la sorastanza trentina del GECT, che la scomenzarà sie lurier con de otober del 2021.
Chesta la inovazions maores:
- Smaorament de l’Assemblea, che ades la é de 15 membres (dant i era 12): donca l president e n auter component di òrghegn esecutives de ogneun di trei membres del GECT Euregio e trei membres (president e etres doi componenc) di òrghegn legislatives di trei membres del GECT; se à smaorà donca da 2 a 3 la partezipazion a l’Assemblea di componenc di òrghegn legislatives di trei membres del GECT;
- Met de meter sù Jontes spezialisèdes, olache tol pèrt i membres di òrghegn esecutives competenc per materia e ge dèr sù encèries spezifiches; la sorastanza de chesta Jontes spezialisèdes la ge pervegn al member de l’òrghen esecutif de chel che fèsc pèrt l President del GECT;
- Tor ite i Comuns, metan sù l Consei di Comuns, n òrghen consultif per la costions e la tematiches che revèrda sie ciamp de competenza e che à n efet particolèr su chisc, formà dai raprejentanc di Comuns en esser ti teritories di membres de l’Euregio Tirol-Südtirol-Trentin che abie n mandat litèl;
- Tor ite i sentadins, metan sù Consees aposta di sentadins sun tematiches de emportanza per l svilup del GECT, col met de portèr dant racomandazions, proponetes operatives e amò apede la previjion de n derit de petizion.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)
Immagini
