Giovedì, 23 Settembre 2021 - 15:24 Comunicato 2616

Traduzione in ladino
L Trentin per la familia: l’é stat portà dant l raport su la politiches familières

En jebia ai 16 de setember del 2021 l’é stat endrezà l seminarie su la situazion de atuazion de la Lege provinzièla 1/2011

Na scontrèda per duc chi à enteress, per n focus su la familia, sie benesser e i strumenc metui en doura sun nosc teritorie per favorir i projec de vita familièra: en jebia ai 16 de setember, de domesdì, l’é stat endrezà l seminarie online per despieghèr la situazion de atuazion de la lege provinzièla 1/2011, relatores Carlo Buzzi, professor del Partiment de Sociologìa e enrescida sozièla de l’Università de Trent, Giovanna Fambri, sorastanta de l’istitut de statistica de la Provinzia Autonoma de Trent e Luciano Malfer, sorastant generèl de l’Agenzìa per l leam sozièl, la familia e l nasciment.
La familia, enceben che nasc semper manco fantolins, che sie dificoltèdes leèdes a la crisa economica e a la pandemìa, che la jent vif semper più en lènch e che sie semper manco joegn, l’é amò n pilèster per la sozietà trentina. I dac porté dant angern, seence che i moscia de gran mudazions te la families, i à desmostrà che chi che fèsc referiment a nosc teritorie, sun dotrei aspec i é dassen desferenc. Per ejempie te chisc ùltimes 10 egn, per chel che vèrda la composizion de la families, tel Trentin, respet a etres teritories, l’é smaorà l numer de chela families con trei o più che trei fies; più che la metà de la families les é contentes de sia situazion economica e i indicatores del benesser familièr, estra che chel economich, i desmostra che la calità de la vita familièra te nosc teritorie la é dassen miorèda col jir inant del temp.

Descheche l’é jà stat dit, la familia l’é la categorìa che de fat à arsegurà de poder tegnir sù l sistem sozièl ence endèna la pandemìa, ajache la é stata sobito bona de se endrezèr per ge fèr front a la endesfides ries entravegnudes te chest ùltim an e mez. La crisa pandemica no à ferà nience l gran sostegn de la politiches familières metudes a jir sul teritorie, che les à desche obietif chel de didèr la families no demò a esser l prum soget che dèsc welfare, ma de ge dèr i strumenc per realisèr sie projec de vita. En cont de chest l pian strategich per meter en doura la lege 1/2011 l’é n strument fondamentèl acioche l’endrez aministratif l sie percacent

I intervenc i revèrda l ge dèr de contra al smendrament demografich, i didamenc economics, la giusta armonisazion del temp da dedichèr a la vita privata e al lurier, l didament ai joegn a doventèr gregn. L sistem trentin “calità familia” l’é l soul te duta la Tèlia, ence de gra a la rei di Distrec familia che la doventa semper più grana: l’é passa 900 la organisazions che tol pèrt al welfare teritorièl, desche per ejempie musees, scoles, organisazions profit e no profit, te na cordanza teritorièla outa a svilupèr projec che deida la families. No se desmention de la pèrts che à i Comuns Trentins zertifiché desche “pecont de familia” che tras la ativitèdes sul teritorie, i aproa i pians familia e i ge dèsc na direzion a la politiches de rei per meter a jir oportunitèdes per la families trentines.

Apede a chesta realtèdes, l’é ence la firmes “family friendly” e dut n sistem che col jir inant del temp à fat doventèr nosc teritorie na realtà che tol dant i projec familières, engaissan sia doura. Strumenc desche voucher sportives e cultuèi, la zedoles servijes e recognoscimenc a favor de la organisazions zertifichèdes l’é segnèi emportanc che palesa la carateristiches bones del sistem de la politiches familières trentines.

Per i documenc e le slide del seminarie:
https://www.trentinofamiglia.it/News-eventi/News/Un-affresco-sulla-famiglia-in-Trentino-e-a-livello-nazionale

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)

Fonte: Ufficio Stampa

Versione Stampabile

Immagini

Visualizza

Potrebbero interessarti: