Te la Sala Depero che la era piena e rèsa per l’ocajion, l’Aministrazion provinzièla à volù sotrissèr coche la valorisazion per l’Autonomia spezièla del Trentin, a una col Südtirol e te la Region, sibie n percors feruscol.
Ben segur cogn jir inant l’azion per portèr inant a na vida adatèda la cultura de l’autonomia e soscedèr la consaputa di sentadins, tras azions delaite de la scola e te l’educazion a la zitadinanza.
Recordan “l gran moviment del popol” che l’é stat l’Asar, Sociazion studies autonomisitics regionèi, che dò la vera l’à soscedà gran ferment ti momenc olache se metea en esser l Statut autonomistich e se metea jù i fondamenc costituzionèi de noscia Autonomia, la comunanza trentina l’à l doer de “ge fèr front” apontin a chela “tenjion per la partezipazion outa al ben comun”. Tegnan sù i prinzipies coleé a l’intuizion degasperiana: autogoern desche responsabilitià, bona aministrazion, cordanzes e relazions con etres teritories.
L confront – che l’é en esser da 50 egn en cà - anter Trentin e Südtirol dintornvìa l Statut, pel jir zenz’auter inant. I lesc de condivijion e i strumenc no i mencia. La Region, “lech de azion strategich”, Eusalp, l Gect Euregio che l’é ruà ai 10 egn la arjonc la reforma de sie endrez istituzionèl. Vegnarà dapò trei fases fondamentèles de elaborazion dessema coi etres teritories e col Minister per i Afares regionèi e co la Autonomies Mariastella Gelmini, a Viena, Roma e tinùltima a Bruxelles, per sotrissèr l’emportanza internazionèla che à l’Autonomia spezièla.
La dì de l’Autonomia, l’é stat recordà tinùltima, l’é l moment per festejèr la sotscrizion de la cordanza internazionèla che à metù i fondamenc per l davegnir del Trentin.
Endèna la zerimonia, anter i intervenc, l’é stat chel del dozent universitarie Fulvio Cortese dal titol “Autonomia e bona aministrazion: l’atualità de n coleament che no se pel spartir”.
Da man de l’Aministrazion provinzièla n develpai al prefet Sandro Lombardi, jà comissarie del goern per l Trentin, a chel che ge é stat dat l recognosciment de l’Egua de Sèn Venceslao. Per “la sensibilità e la professionalità particolèra” desmostrèda te sia encèria e per aer valorisà “l prinzip de na colaborazion dreta che l’é cher del raport anter la istituzions di desvalives livie”.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
