A bichtegar moment bart soin in mitta 28 balda di toalnemar bartn bokhennen di kampiü von Fiamme Oro boda håm gemacht internatzionalgare, gebinnante di earstn plètz in di Olimbipadi, Beltkup un Europbèltkup.
Fra de se Nadya Ochner, Arianna Sighel, Stefano Ghisolfi, Daniel Grassl, Nadia Delago, Camilla Moroni, Alex Insam, Anna Comarella. Auz pa boch izzta inngerichtet o a besuch in Villaggio Viola von AC Fiorentina, squadra von spilfuss boda iz in da belese serie A , hergetzoget a Moena. Auz pa boche soinda inngerichtet kulturalmomentn un vo gebizza, az per dar abas aftn cyberbullismo.
"Dar Sport Kamp iz a initziativ boda nempart in Euregio in djungen un boden gitt vèrt zo lirna naüge sachandar boda hèrta bart khemmen guat. Alle dise djungen von drai Lentar, pittnåndar a Moena, iz a zuarvall bodaz gitt ploaza sodisfatziong un boden bart machan vorstian bazzen mage voaln dar Euregio” khüttar da Corsitzar vodar Sèlbartgerédjart Provintz vo Tria Maurizio Fugatti.
" ’Z erleba von Euregio Sport Camp – khütta dar asesór in sport vodar Sèlbartgerédjart Provintz vo Tria, Roberto Failoni, gitt zuar bia dar sport sèlbart mage helvan di djungen boda zuarkhemmnen vo åndre saitn, zo khennase un an konkrètfaktor zoa azta dar Euregio sai eppaz boda pintet un boda macht lem sachandar boda helvan un boda interesarn in laüt von drai Eardar boden leng panåndar, in disan kaso pitt an oage afte djungen”.
Übarsetzt von Türle afta Zimbarzung von Kamou vo Lusérn
