L schem de convenzion l perveit de smaorèr la linia 471 “Val Gherdena – Jouves de la Dolomites” del conzescionèr SAD Trasporto Locale S.p.A. de Busan da la utia Passo Sella a Cianacei. Per chest servije dai 20 de jugn ai 17 de setember la Provinzia autonoma de Trent la ge paarà a la sozietà € 50.210,88 (zenza SVE). La convenzion la perveit ence che ai utenc ge vegne fat paèr per duta la streca, la tarifes en doura te la Provinzia de Busan. Sul toch de percors Cianacei - Jouf de Sela e Jouf de Pordoi - Jouf de Sela (linia 417), dai 20 de jugn ai 17 de setember, e su la streca Busan – Val d’Ega – Vich (linia 180) – per l sevije metù en esser semper da la sozietà Sad – dai 20 de jugn ai 11 de dezember de chest an, la Provinzia autonoma de Busan la azetarà la “Guest Card” de la Provinzia autonoma de Trent, tel format digitèl sul smartphone, o sun papier. La validazion la vegnarà fata tras la scanscion del codesc QR. Chi che monta su la coriera e che no à chesta app, podarà moscèr la tessera trasport e la “Guest Card” valevola.
Con chest provediment se vel favorir la mobilità sostegnibola sul teritorie dolomitich smaoran i servijes en esser te la doi provinzies. Smaoran l percors enscin a Cianacei de la linia 471 “Gherdena – Jouves Dolomitics” del conzescionèr SAD se vel ence smendrèr l trafich individièl sui jouves dolomitics, mioran tel medemo temp l coleament anter la provinzies de Trent e de Busan.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
