Vor bazta ågeat di di test antigenici dar Vorsitzar hatta gehaltet zo khöda ke dar Ministero vor di Gesunthait hatt nonet zuargètt zo lazza auz dise date. “balda dar Ministero bartzaz zuargem alóra barpaz tüan vor est tüabar asó azpe da tüan alle di åndarn redjongen – hatta khött dar Fugatti.
An lestn, dar Vorsitzar vodar Provìntz, dòpo zo haba gemacht an åndarn tupfar hatt khött ke dar hatt no hèrta in virus siånka azzar nicht höart.
Di Asesören Stefania Segnana hatt khött ke asó azpe ma hatt gehatt auzgemacht in Djunta an vraita atz 13 bintmånat bartma süachan an akòrd pinn sindakètt, boda soin gerüaft an menta atz 16 zo maga åstèlln åndre infermìarn nå in roatordnung vodar APSS zo macha dena arbatn in di rasthaüsar.
Zbisnen in bichtegarstn naüng sachandarn in vorschrif izta daz sèll boda ågeat in orario von birthaüsar un von ristorént in da gel zone boma mage servìrn di laüt lai affon tisch, ma geat vür zo mocha haltn gespèrrt vo di sèkse abas vort. In di tang vor di vairta bartnda stian gespèrrt alle di grozan un di mittln geschèft, di vorkhoaf zentrum o, auz baz farmacie, parafarmacie, tabakìn, djornél un di sèlln boda vorkhoavan geèzza.
Di vairta niamat bart mang vorkhoavan nicht auz baz farmacie, parafarmacie, tabakìn, djornél un di sèlln boda vorkhoavan geèzza.
Mearar strengat anvétze di maz boda ågian in drai kamöündar boda von menta 16 vort bartn khemmen z’soina roata zone. Ma bartze nèt mang mövarn auz von kamou boma lebet auz baz vor arbat, groazan noat un vor gesunthait. ’Z bartnda stian gespèrrt birthaüsar, ristorént un geschèft auz baz di supermerkate. ’Z bartna offestian farmacie un parafarmacie, bescherai, fersür un barbìarn. Ma bart mang ummar gian lai nåmp soin haus. Vor di schualn anvétze bartz stian allz gelaich, ’z stianda offe di untarschualn un di obarschualn lai vo baitom.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
