Desposizions en cont de co meter a jir i ejames antigenics te la speziarìes
La speziarìes olache vegn fat ejames antigenics asvelc les cognarà manèr ite n messaje de enscinuazion tel Protocol nazionèl a la Apss a chesta direzion e-mail: abilitazioneesterni@apss.tn.it. La speziarìes olache vegn jà fat chest ejam les podarà seghitèr sia atività e les vegnarà conscidrèdes enscinuèdes tel nef protocol.
Partezipazion del publich a evenc/garejèdes sportives e spatacoi te impianc e strutures daìte e a l’averta
Tel respet de l’obligh de aer la zertificazion verda covid, vegn confermà che la strutures no pel tor ite più che l 50% de sia capazità.
Evenc o ativitèdes te lesc gregn e no ensevié ite
No l’é de besegn de aer la zertificazion verda covid per i evenc e la ativitèdes che vegn fac te lesc gregn e no ensevié ite, che no abie entrèdes spezifiches e dedichèdes, olache pel esser ence persones che no les é aló aposta per tor pèrt a chisc evenc e donca no i é destiné a n publich definì dantfora e no i vegn porté dant te lesc dediché demò a chel event o chela atività.
Resta enveze en doura chel che l’é stat pervedù per sègres e fieres, schecondir l’azess demò con zertificazion verda covid e l’obligh per i organisadores de meter en consaputa l publich tras tabeles aldò; se vegn fat n control, ciaparà na multa demò la persona zenza zertificazion verda e no i organisadores, se i à respetà i oblighes de informazion.
Impianc portamont per l turism da d’istà
Vegn confermà che se pel fèr montèr sù no più che l 50% de la capazità; estrapede, per arsegurèr n endrez mior e più segur tel jir e vegnir de la persones che doura i impianc, vegn mudà l calcol del tet de pruma entrèdes che se pel arjonjer vigni dì, semper ampò tel respet de l’obligh de no fèr montèr sù più che l 50% de la capazità.
Zertificazions verdes covid e prozess de control te la scoles e te la istituzions del sistem educatif provinzièl e ti servijes educatives per fantolins
Vegn slarià fora l met de durèr i etres strumenc de control de la zertificazion verda covid che se jonta apede l’aplicazion per fonins App “VerificaC19” ence da pèrt di sorastanc de la istituzions de scola e formazion del sistem educatif provinzièl, di responsaboi di servijes educatives per fantolins, di sorastanc de la scolines provinzièles e ence di responsaboi de la scolines equiparèdes.
Amò apede se deschiaresc che l’obligh de la zertificazion verda covid vèl ence per l personal scolastich, tant ensegnanc che no ensegnanc, e ence per l personal che laora ti servijes educatives per fantolins, te la istituzions de scola e formazion per ativitèdes outes a l’inclujion scolastica, enceben che i sie dependenc de enc privac e convenzioné con chesta istituzions, e tinultima ence per dut l personal che sibie en servije con funzions che pel vegnir conscidrèdes desche cheles portèdes dant dal personal de scola.
Indicazions de endrez per l’atività di istituc del sistem educatif provinzièl e di servijes sozio-educatives per fantolins e per la istituzions de scola e formazion de la socles populères, mesènes e autes
L’atività didatica e formativa, col prum de setember, la cognarà vegnir metuda a jir tel respet de la neva Indicazions de endrez provinzièles.
Menses aziendèles e locai duré per l servije de restorazion per i dependenc publics e privac
I lurieranc pel jir ite te la mensa aziendèla o ti locai duré per l servije de restorazion demò se i à la zertificazion verda.
Se pel troèr l’ordenanza e la enjontes a chest link: https://www.ufficiostampa.provincia.tn.it/CORONAVIRUS-Aggiornamenti-e-comunicazioni
