Traduzione in ladino
Cincant’egn dal secondo Statut de Autonomia, n avis de concors per joegn artisć trentins
Domanes dant che vae fora ai 31 de otober del 2021
N avis publich per engaissèr la partezipazion e l’azess al finanziament da pèrt de joegn artisć e organisazions artistiches metudes adum per la maor pèrt da joegn enciasé tel Trentin o con senta tel raion provinzièl, per endrezèr projec culturèi con argoment i Cincant’egn del secondo Statut de Autonomia: l’é stat aproà da la Jonta provinzièla endèna la scontrèda de en vender al 1m de otober, su proponeta de l’assessor a l’istruzion, università e cultura, metan a la leta 140 mile euro per scomenzadives tel ciamp de teater, mùsega, bal, cinema, audiovisives e èrts visives.
Se trata de n prum avis che met en doura l’articol 28 bis de la lege provinzièla dintornvia la ativitèdes culturèles che revèrda apontin la scomenzadives per i Cincant’egn del secondo Statut e che se perveit de portèr dant endodanef co n auter avis de concors tel 2022. L valor de chesta oportunità l se basa su l’idea che la generazions joenes no les sie demò avantores de cultura, ma sogec che met en esser proponetes culturèles, te chest cajo con scomenzadives che posse jir tel fon de la storia de la comunanza trentina e soraldut de l’argoment de l’Autonomia. La domanes de contribut les pel esser portèdes dant, dant che sie fora ai 31 de otober del 2021 al Servije atività e produzion culturèla.
Conscidrà i sacotenc ciampes culturèi a chi che se ouc l’avis, la valutazion di projec artistics la ge vegn data sù a n grop de lurier, che laora debant, e l’é metù adum dal sorastant del Servije atività e produzion culturèla de la Provinzia de Trent Claudio Martinelli, dal diretor del Zenter Servijes Culturèi S. Chiara Francesco Nardelli, dal funzionarie del Museo de Èrt moderna e contemporanea Gabriele Lorenzoni, dal responsabol de la Trentino Film Commission Luca Ferrario, da la rapresentantes enciarièdes per la Fondazion Museo Storich del Trentin Sara Zanatta e per l Comitat per i Cincant’egn del secondo Statut de autonomia Elisa Bertò.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
(cdt)
Immagini
