La modalitèdes per jir ite te la strutures sanitères de APSS les é states stabilides aldò de la “Indicazions per meter endò a jir la vijites ti partimenc di ospedèi” del Partiment sanità e politiches sozièles de la Provinzia autonoma de Trento.
Avisa, pel jir a troèr n pazient te ospedèl doi persones (jent de familia, caregiver, compagnadores) che pel ite te partiment un a l’outa, aldò de la desponibilità. Per no binèr adum massa jent te l’entrèda e spartir fora la prejenzes delaite del partiment i oraries e la regnèda de la vijites i cogn esser cordé dantfora e programé co la cordenadora/cordenador infermieristica/h (o sie sostituc) per telefon o a ousc. A chi che va ite per la pruma outa te partiment ge vegnarà domanà de scriver ite n’autodeclarazion e moscèr la Zertificazion verda Covid-19.
Ogne outa, che l vijitador rua te partiment l cogn scriver ite l’autozertificazion che l cogn ge moscèr al personal sanitèr, se ge vegn domanà, olache l declarea: de se aer mesurà la fiora (mendra che 37,5 degrees), de no aer sintomes che podessa esser Covid-19 (tos secia, fadìa a tirèr l fià, dolores ai muscoi, mèl de cef, faringodinia e c.i.), de no esser stat apede a persones che podessa esser malèdes o che ge é stat zertificà l’infezion de SARS-Cov-2 e che les cogn fèr la carantena o esser en isolament. Tel cajo fossa ence demò un de chisc criteries l vijitador cogn jir de retorn a sia cèsa e chiamèr sie Dotor. Chi che rua te partiment cogn tegnir su la mèscra de protezion chirurgica e se dejenfetèr la mans col gel idroalcolich. Ge vel se dejenfetèr la mans ence dò aer abù n contat diret col malà te cambra e canche se va fora dal partiment. Se pel jir a troèr n malà demò delaìte de sia cambra. Te vèlch cajo, se pel jir a troèr ence pazienc che podessa esser malé de Covid-19: enlouta fèsc besegn de l’autorisazion del diretor de la Unità operativa, ge vel se emprevaler de fornimenta de protezion aposta e cogn vegnir respetà la normes de segureza e la indicazions metudes dant dal personal del partiment.
Ti ospedèi de Ciavaleis e Rorei l’é stat metù sù te chisc dis a na vida sperimentèla i prumes “totem” per l zertament de la Zertificazion verda Covid-19. Se trata de aparac compré da la protezion zivila trentina per la strutures publiches, sanitères e sozio/sanitères.
Sul sit de l’ASPP l’é a la leta i modui per l’autodeclarazion e l’autozertificazion per chi che va ti ospedèi: https://bit.ly/3sz7KMu
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
